დღეს ჯანჯაფილის დადებით და უარყოფით თვისებებზე მოგიყვებით. თუმცა სანამ ამაზე გადავალთ, ცოტა რამ მის წარმომავლობაზეც გავიგოთ. ჯანჯაფილი იაპონიაში, ინდოეთში, ბრაზილიაში, არგენტინაში, ჩინეთსა და ვიეტნამში მოჰყავთ, თუმცა მისი მშობლიური მხარე ინდოეთი და ჩრდილო-აღმოსავლეთ აზიაა.
ჯანჯაფილი, ყურადღებას ყოველთვის მისი საუცხოო არომატითა და გამორჩეული გემოვნური მახასიათებლებით იპყრობს. მსოფლიოს მედიკოსების რეკომენდაციით კი, ის ორგანიზმისთვის სასარგებლო თვისებებით და ვიტამინებით არის სავსე.  

ბოლო დროს განსაკუთრებით პოპულარული გახდა მისი მოხმარება კერძებში, სასმელებში, დიეტის დროსა თუ სამკურნალოდ. მიუხედავად იმისა, რომ ჯანჯაფილი ხელს უწყობს საკვების მონელებას, აქვს ანთების საწინააღმდეგო თვისებები, შეუძლია გულისრევის შეგრძნებისა და მუცლის ტკივილის შემსუბუქება, ხელს უწყობს ორგანიზმის გაწმენდას, შველის ტოქსიკოზს, კუნთების დაჭიმულობას ვარჯიშის შემდეგ  და ყელის ტკივილს, აუცილებლად უნდა გითხრათ ისიც, რომ მას უარყოფითი თვისებებიც ბევრი აქვს.
რაც არ უნდა გასაკვირი იყოს, ის ძლიერად მოქმედებს კუჭისა და ნაწლავების ლორწოვან გარსზე. ამიტომ მათთვის, ვისაც აწუხებს წყლული, გასტრიტი და აქვს ღვიძლის პრობლემები ჯანჯაფილის მიღება რეკომენდირებული არ არის. ასევე, არ არის სასურველი მისი მიღება დიაბეტის მქონე ადამიანებისთვის.

გარდა ზემოთ ჩამოთვლილი უარყოფითი თვისებებისა, მან შეიძლება გააძლიეროს სისხლდენა, ცხვირიდან სისხლდენით დაწყებული - სწორი ნაწლავიდან სისხლდენით დამთავრებული. მას ასევე აქვს სითბოს გამომუშავების თვისება და მიუხედავად იმისა, რომ უებარია გაციების დროს, კატეგორიულად დაუშვებელია მაღალი ტემპერატურის შემთხვევაში. იმ შემთხვევაში, თუ ალერგიული ხართ, შესაძლოა ჯანჯაფილის უარყოფითი თვისება ამ შემთხვევაშიც გამოვლინდეს და თქვენზე უარყოფითად იმოქმედოს.

ამ ყველაფრიდან კი, დასკვნა ერთია: ჯანჯაფილი არის მცენარე, რომელიც შეიცავს დიდი რაოდენობით სასარგებლო ნივთიერებებს, თუმცა ამის მიუხედავად მასაც აქვს უკუჩვენება. ამიტომ გირჩევთ, ჯანჯაფილის გონივრულად გამოყენებას, რათა მისგან მხოლოდ სარგებელი მიიღოთ.